Friday, February 25, 2005


Zoom in and observe :-) Posted by Hello

சில சமயம் சில போட்டோக்கள் நம் கவனத்தை சட்டென்று ஈர்க்கும். நான் ஒரு தொழில்முறை போட்டோகிரபர் அல்ல. அமெச்சூர் வகையிலும் சேர்த்தியில்லை. ஆனால் அவ்வப்போ வெளியில் போறபோது கேமிராவும் கூட வரும். ஏதோ கண் போன போக்கில் சுட்டுக் கொண்டிருப்பேன் - வீட்டு ஆல்பத்துக்காக. 34 வருடங்கள் முன்பு படிப்பு முடிந்து பத்திரிகையாளர் கோர்ஸ் படித்துக்கொண்டிருந்தபோது அப்பா /அம்மா உபயோகித்துக்கொண்டிருந்த பழைய "ஆக்·பா" காமிராவில் அப்பாவின் " How to Make Good Pictures" ( Black & White - Kodak Manual for Amateur Photographers - எந்த வருடப் பதிப்பு என்று அதில் போட்டிருக்கவில்லை; நிச்சயம் கலர் உலகம் வருவதற்கு பல வருடங்கள் முன்னால்) என்ற புத்தகம்தான் குரு. அருமையான புத்தகம். பிரமாதமான கறுப்பு வெள்ளை போட்டோக்கள். இன்று பார்த்தாலும் சந்தோஷமாக இருக்கிறது.
நிழல் படம் என்று நினைத்துக்கொண்டு என் மேஜையருகே இருக்கும் கண்ணாடி பெயிண்டிங், வரவேற்பறையில் கோணலாக போட்ட நாற்காலி, அரையிருட்டில் செடி என்று எதையோ எடுத்துக் கொண்டிருப்பேன். எத்தனை வருடம் ஆனாலும், இன்றுவரை முழு திருப்தியாக ஒரு படம் எடுக்கவில்லை என்று தோன்றுகிறது.

இருந்தாலும் நல்ல படங்கள் கண்களில் தென்படும்போது ஒரு உற்சாகம் வந்து தொற்றிக்கொள்ளும். இங்கே இருக்கும் படம் ஒன்றும் பிரமாதமானதல்ல. இருந்தாலும் இந்த விளம்பரம் பார்த்தவுடன் என்னை கவர்ந்தது ; யோசிக்க வைத்தது. இதில் பெரிதாக கருத்தோ கதையோ இல்லை. சொல்லப்போனால், ஸ்டேட் பேங்கில் கார் லோன் வாங்க சொல்லி தூண்டும் இந்த விளம்பரம் அதற்கு உதாரணமாக காட்டுவது பின்பக்கம் பார்க்கும் கண்ணாடியில் வரிசையாக தெரியும் கார்கள் - சகல சௌகரியங்களுடன் கூடிய ஸ்டேட் பேங்க் லோன் வாங்கி நீங்கள் மற்றவர்களைவிட பல கிலோமீட்டர் முன்னால் போகிறீர்கள் என்பது இந்த விளம்பர copy சொல்கிறது. ரொம்ப Plain.
ஆனால் என் கவனம் விளம்பர வாசகம் அல்ல. போட்டோ. கார் உள்ளிருந்து வெளியே தெரியும் சாலை out of focus ல் - சற்று மங்கலாக தெரியும்படி எடுக்கப்பட்டுள்ளது. அதே சமயம் உள்ளே rear view கண்ணாடியில் நல்ல தெளிவாக பின்னால் வரும் கார்கள். கொஞ்ச நேரம் எனக்கு புரியவில்லை. எப்படி இதை எடுத்திருப்பார்கள் என்று யோசிக்க வைத்தது. கண்ணடியில் தெரியும் பிம்பங்களை குவியத்தில் வைத்து எடுத்திருக்கிறார்கள். அதனால் எதிரே விரியும் சாலை, குவியத்திற்கு அப்பால் போய் கலங்கலாக தெரிகிறது. இல்லை, ஒரு வேளை தனித்தனியே எடுத்து போட்டோ ஷாப் வகையறா செய்திருப்பார்களா? கொஞ்ச நேரம் யோசித்ததில் முந்தைய வகையாயிருக்கும் என்று முடிவுக்கு வந்தேன். என் ஊகம் சரிதானா?

4 comments:

Navan said...

எனக்கென்னவோ போட்டோ ஷாப் வேலை என்று தோணுகிறது. வெறும் அவுட் ஆப் ஃபோகஸ் மாதிரி தெரியவில்லை. கீழே எழுத்துக்கள் ஆரம்பிக்கும் இடத்திலும் சாலை ஓரத்திலும் ஒரே மாதிரி வரிகள்.

Aruna Srinivasan said...

அட, நுணுக்கமாக கவனிச்சிருக்கீங்க நவன் :-)

புலம்பல்ஸ் said...

Look at the rear view mirror. Cars on either sides of the yellow line are traveling in the same direction. Shouldnt they be traveling in the opposite directions?!

நா.கண்ணன் said...

I think it is 'photo-magic' :-) Hari is correct in his observation.